ভাৰতীয় চলচ্চিত্ৰ “Laapataa Ladies” আৰু ফ্ৰান্সৰ ২০১৯ চনৰ আৰবিক চুটি ছবি ‘Burqa City’ৰ মাজত আশ্চৰ্যজনক মিল থকা বুলি দাবী কৰি ফ্ৰান্সৰ চলচ্চিত্ৰ নিৰ্মাতা ফেব্ৰিছ ব্রাকে কপিৰাইটৰ অভিযোগ উত্থাপন কৰিছে। উল্লেখযোগ্য যে, কিৰণ ৰাও পৰিচালিত লাপাটা লেডিজ ২০২৪ চনৰ ১ মাৰ্চত মুক্তি পাই বিশেষ চৰ্চিত হৈছিল।
ব্ৰাকৰ অভিযোগ অনুসৰি, এই হিন্দী ছবিখনত তেওঁৰ চুটি চিনেমাৰ বহু দিশ, যেনে—প্লট টুইষ্ট, চৰিত্ৰৰ গঠন, সংলাপ আৰু বুড়খা পিন্ধা মহিলাৰ ছবি দেখুওৱা দৃশ্য—সাদৃশ্যপূৰ্ণ ৰূপত দেখিবলৈ পোৱা গৈছে। ইণ্ডিয়া টুডেৰ সৈতে হোৱা এক সাক্ষাৎকাৰত ব্ৰাকে কয়, “ছবিখন চোৱাৰ আগতেই কনচেপ্টৰ মিল দেখি আচৰিত হৈছিলোঁ। চোৱাৰ পাছত দেখি মনত পৰিল— এইটো মোৰ ছবি ‘ ‘Burqa City’’ৰ ওপৰত নিৰ্মাণ কৰা যেন লাগে।”
ভাইৰেল ভিডিঅ’ৰ প্ৰভাৱ:
এই বিতৰ্কত ঘি ঢালে এটা ভাইৰেল ভিডিঅ’ — য’ত ‘Burqa City’ আৰু “Laapataa Ladies”ৰ দৃশ্যবোৰ কাষে-কাষে ৰাখি তুলনা কৰা হৈছে। ভিডিঅ’টোৱে সামাজিক মাধ্যমত ব্যপক চর্চা লাভ কৰিছে, আৰু বহু দর্শকে ““Laapataa Ladies””ক অপ্ৰেৰণাদায়ক বুলি আখ্যা দিছে।
চিত্ৰনাট্যকাৰ বিপ্লৱ গোস্বামীৰ উত্তৰ:
চিত্ৰনাট্যকাৰ বিপ্লৱ গোস্বামীয়ে এই অভিযোগক সম্পূৰ্ণভাৱে অস্বীকাৰ কৰি কয়, “ছবিখনৰ গল্প ২০১৪ চনতেই Two Brides নামেৰে Screenwriters Association-ত পঞ্জীয়ন কৰা হৈছিল। ২০১৮ চনত ফিচাৰ স্ক্ৰিপ্ট(feature script) হিচাপে পুনৰ পঞ্জীয়ন কৰা হয়, আৰু ই Cinestaan Storytellers Competitionত দ্বিতীয় স্থান লাভ কৰে।”
তেওঁ স্পষ্ট কৰে—“চাদৰৰ জৰিয়তে ভুল চিনাক্তকৰণৰ পৰিঘটনাটো সাহিত্যৰ এক প্ৰাচীন ধাৰা, যাক শ্বেইক্সপীয়াৰ, টেগোৰ, আৰু দ্যুমা আদি লেখকে বহু আগতে ব্যৱহাৰ কৰিছিল। গোস্বামীয়ে কয়, ““Laapataa Ladies”ৰ চৰিত্ৰ, সংলাপ, আৰু সামাজিক প্ৰসংগ সম্পূৰ্ণভাৱে মৌলিক।” এই অভিযোগে মোৰ আৰু সমগ্ৰ দলৰ পৰিশ্ৰমক অসন্মান কৰে।” তেওঁ SWAৰ পঞ্জীয়ন প্ৰমাণপত্ৰও সামাজিক মাধ্যমত শ্বেয়াৰ কৰে।
ছবিখনৰ বিষয়ে:
কিৰণ ৰাওৰ এই দ্বিতীয় পৰিচালনা প্ৰচেষ্টা লাপাটা লেডিজত মুখ্য চৰিত্ৰত আছে স্পৰ্শ শ্ৰীৱাস্তৱ, প্ৰতিভা ৰন্ত, নিতাংশী গোৱেল, আৰু ৰৱি কিষণ। ছবিখনে গাঁৱৰ সামাজিক অৱস্থা, লিংগ বৈষম্য আৰু আত্মবিকাশক কেন্দ্ৰ কৰি এটা দৃঢ় ব্যাখ্যা আগবঢ়াইছে।
উপসংহাৰ:
এই বিতৰ্কই চলচ্চিত্ৰ জগতত মৌলিকতাৰ প্ৰশ্নটোক আকৌ এবাৰ উত্থাপন কৰিছে। ব্ৰাকে এই সন্দৰ্ভত কোনো আইনী পদক্ষেপ ল’ব নে, সেয়া এতিয়ালৈকে নিশ্চিত নহ’লেও, বিপ্লৱ গোস্বামীৰ দলৰ পক্ষৰ পৰা প্ৰমাণে ছবিখনৰ স্বকীয়তাক সমৰ্থন কৰিছে।
লগতে পঢ়ক – Aamir Khan Talkies – আমিৰ খানে আৰম্ভ কৰিছে YouTube চেনেল
